Davao del Sur — Patay ang usa ka electrician nga giila nga si Arnel Dela Cerna, 53 anyos, human aksidenteng mabuthan og pistola nga gipanag-iya sa usa ka konsehal sa Digos City. Ang biktima gi-deklarar nga dead on arrival sa Davao del Sur Provincial Hospital tungod sa grabe nga pagdugo.
Base sa imbestigasyon sa kapulisan, nag-inum ang biktima uban nila Councilor Edmund Alegria Jumawan Jr., Moises Bueno, ug Jamil Comablay sa sulod sa EJ Lights and Sounds nga pag-apanag-iya sa konsehal sa Barangay Zone 3, Lapu-Lapu Extension, Digos City niadtong Oktubre 28, 2025, alas 8:00 sa gabii.
Samtang nakatulog si Councilor Jumawan, gikuha sa biktima ang pistola nga nakasukbit sa likod sa konsehal aron malikayan ang posibleng disgrasya. Apan, aksidente hinuon nga nakablit si Arnel sa Glock .40 Smith and Wesson nga armas, hinungdan nga mibuto kini ug nakaigo sa iyang wala nga paa, samtang naigo usab ang iyang kauban nga si Moises Bueno sa tuo nga bagtak.
Gidala dayon ang mga biktima sa ospital apan namatay si Arnel tungod sa loss of blood, samtang padayon nga gitambalan si Bueno. Narekober sa mga otoridad ang tulo ka basyo sa bala ug ang armas nga rehistrado kang Councilor Jumawan.
Mismo ang konsehal ang mitawag sa kapulisan aron ireport ang insidente bandang alas 12:25 sa tungang gabii. Gipahinumdoman karon sa Digos City Police ang publiko nga magmatngon ug magpakabana sa paggamit sa armas ug sundon ang basic rules of gun safety aron malikayan ang susamang insidente.(Camille Santos Naraga)(Source: Contributed)