DAVAO CITY – Nagbakbakan ang pwersa sa gobyerno ug mga armadong grupo sa sentro sa Tipo-Tipo, Basilan kaganihang buntag, Oktubre 28, 2025, sa usa ka inisyal nga engkwentro nga giingong gisuportahan sa pwersa sa MILF.
Sumala sa post ni Currs Aho, halos wala nay tawo sa sentro sa Tipo-Tipo human manghikling ang mga residente tungod sa kahadlok nga mapagan sa nagpadayong bakbakan.
Base sa ulat, nagsugod ang engkwentro human nagka-initay ang duha ka armadong grupo, ug dayon nang-apil na ang pwersa sa gobyerno aron mupahupay sa tensyon ug malikayan ang mas grabe nga kagubot.
Gipangulohan karon sa Coordinating Committee on the Cessation of Hostilities (CCCH) uban ang provincial government ang mga paningkamot sa negosasyon alang sa kalinaw, apan sumala pa ni Mayor Tong Istarul, wala pa kini naghatag ug positibong resulta.
Sa pinakabag-ong update ni Currs Aho, temporaryong naundang ang engkwentro human mibundak ang kusog nga ulan, apan nagpabilin gihapon nga alerto ang mga pwersa sa lugar. .(Camille Santos Naraga)(Source: Contributed)