GLAN, Sarangani Province — Naputol ang giingong ilegal nga kalihokan sa usa ka lalaki human kini masikop sa buy-bust operation nga gilusad sa mga otoridad sa Barangay Tapon, Glan, Sarangani Province.
Giila sa mga awtoridad ang nadakpan pinaagi sa alyas “Arnel,” 43 anyos, empleyado sa hardware ug residente sa maong lugar.
Nahitabo ang operasyon alas 6:09 sa hapon niadtong Mayo 27, 2026 pinaagi sa hiniusang pwersa sa Philippine Drug Enforcement Agency (PDEA) Sarangani Provincial Office, Glan Municipal Police Station, ug 1st Sarangani Provincial Mobile Force Company.
Sumala sa report, dugay nang gina-monitor sa mga operatiba ang kalihokan sa suspek isip usa ka giingong high-value target sa kampanya batok sa ilegal nga droga.
Narekober sa operasyon ang gibanabana nga 15 gramos sa gidudahang shabu nga adunay kantidad nga ₱102,000.
Gibutyag usab sa mga awtoridad nga ang suspek giingong nalambigit sa pag-apod-apod sa ilegal nga droga sa lugar, hinungdan nga gipailalom kini sa surveillance ug validation sa wala pa gilunsad ang operasyon.
Padayon karon ang imbestigasyon sa kaso samtang giandam ang mga kasong paglapas sa balaod batok sa ilegal nga droga nga isaka batok sa nadakpan.(Camille Santos Naraga)(Source: PDEA-12)