Padayon ang pagpasigarbo sa mga atletang Tagumenyo sa nagpadayon nga Palarong Pambansa 2026 sa Agusan del Sur human makadugang na usab og usa ka bulawang medalya ang usa ka wrestler gikan sa siyudad.
Malampusong nakuha ni Bryan John B. Jusayan ang gold medal sa Wrestling Secondary Boys 58-kilogram category, nga nakadugang sa medal tally sa Davao Eagles sa nasudnong patimpalak.
Si Jusayan usa ka estudyante sa Tagum City National High School ug nagrepresentar sa DepEd Tagum City Division isip kabahin sa delegasyon sa Region XI.
Ang iyang kadaugan usa ka dakong kalampusan dili lamang alang sa Davao Eagles kondili usab alang sa Tagum City, nga padayon nga nagpakita og kusog sa nagkadaiyang sporting events sa Palarong Pambansa.
Nagpadayon ang pagsukol sa mga atletang Dabawenyo sa lain-laing mga disiplina uban sa tumong nga makadugang pa og mga medalya alang sa rehiyon.(Camille Santos Naraga)(Source: DepEd XI)