Dako nga dagok sa smuggling operations ang naangkon sa mga awtoridad human masakmit ang gibanabana nga ₱3.3 bilyon nga kantidad sa kontrabandong sigarilyo ug uban pang produktong tabako sa Gothong Shipping Port sa Barangay Talisay, Nasipit.
Nahuman na sa Philippine National Police (PNP) ug Bureau of Customs (BOC) ang imbentaryo sa 54 ka 40-foot container vans nga gisuspetsahang nagkarga og mga smuggled tobacco products. Mikabat og 17 ka adlaw ang pag-inspeksyon ug pag-ihap sa mga nakompisar nga kargamento.
Sa report sa mga awtoridad, naglangkob ang mga container sa nagkalain-laing imported ug lokal nga brand sa sigarilyo, lakip ang raw tobacco products nga gituohang misulod sa nasud nga walay hustong dokumentasyon ug pagbayad sa buhis.
Ang operasyon gipahigayon sa 1st Agusan del Norte Provincial Mobile Force Company sa pakigtambayayong sa Bureau of Customs Region 13, base sa intelihensiyang ilang nadawat kalabot sa giingong ilegal nga shipment.
Padayon karon ang lawom nga imbestigasyon aron matino ang tinubdan sa mga kargamento ug ang mga tawo o grupo nga posibleng responsable sa maong smuggling activity.(Camille Santos Naraga)(Source: BOC Region 13 / 1st Agusan del Norte Provincial)