DAVAO CITY – Patay ang usa ka estudyanteng rider human mawad-an og kontrol sa iyang motorsiklo ug maligsan sa kasugat nga sakyanan sa Davao–Bukidnon Highway, Barangay Catalunan Pequeño, Davao City, kaganihang kaadlawon sa Miyerkules, Enero 7.
Gidala dayon sa mga mirespondeng miyembro sa Barangay Santo Niño BDRRMC rescue team ang biktima sa Davao Adventist Hospital, apan gideklarang dead on arrival sa doktor pasado alas 3:00 sa kaadlawon.
Giila sa kapulisan ang biktima nga si Laurence John Barbanida Alqueres, 21 anyos, estudyante ug residente sa Wellspring Village Phase 2, Catalunan Pequeño, Davao City.
Sumala sa imbestigasyon sa kapulisan, gikan sa Mintal ug padulong sa sentro sa Davao City ang direksiyon sa rider dihang misubay siya sa highway. Sa dihang miabot sa dapit nga nahitaboan sa aksidente, kalit nga nawad-an og kontrol ang motorsiklo hinungdan nga natumba ang biktima ug napadulong sa kasugat nga lane, diin siya naligsan sa usa ka Daihatsu Wagon utility vehicle.
Gisubay usab sa kapulisan nga gikuha sa kauban sa biktima ang nadisgrasya nga motorsiklo ug wala na kini makita sa dihang miabot ang mga awtoridad. Samtang ang sakyanang nalambigit sa pagkaligsan, nga gimaneho ni Agopitac Doringo Gregorio III, 28 anyos, taga Riverside, Calinan District, Davao City, mibiya sa lugar nga nahitaboan.(Camille Santos Naraga)(Source: Contributed)