DAVAO CITY – Nasikop sa kapulisan ang usa ka lalaki sa Davao City human kini giingong nanghulga sa iyang kanhing uyab (ex-girlfriend) nga ipagawas ang mga pribadong hulagway ug bidyo sa biktima kon dili siya mouyon nga mokuyog ug makigkita kaniya.
Sumala sa report sa Philippine National Police (PNP), adunay access ang suspek sa social media account sa biktima. Giingon usab nga naghimo ang suspek og usa ka group chat nga giapilan sa pipila ka paryente sa biktima, diin iyang gipadad-an ang mga pribadong hulagway sa babaye aron hulgaon ug pwersahon kini sa iyang gusto.
Tungod sa nahitabong hulga ug paglapas sa pribasiya, gilayon nga gipaslak sa prisohan ang suspek samtang nagpadayon ang imbestigasyon sa mga awtoridad aron mahibal-an ang dugang detalye sa kaso ug ang posibleng kaso nga ipasaka batok kaniya.
Gipasidaan sa kapulisan ang publiko batok sa paglapas sa cybercrime laws, ilabina ang pagpanakop ug paggamit sa pribadong hulagway ug impormasyon sa laing tawo alang sa hulga ug pagpugos. (Camille Santos Naraga)(Source: Contributed)