DAVAO CITY – Misangpot sa pagkadakop sa duha ka indibidwal ang usa ka entrapment operation nga gilusad sa mga kapulisan sa Marilog District sa Davao City niadtong Mayo 19, 2026.
Nahitabo ang operasyon alas 5:02 sa hapon sa Purok 08, Barangay Buda, human makadawat og impormasyon ang pulisya kalabot sa giingong pagbaligya og peke nga bulawan o “gold bar.”
Ang duha ka nadakpan mga residente sa Kitaotao, Bukidnon ug karon anaa na sa kustodiya sa kapulisan.
Sa operasyon, narekober gikan sa mga suspek ang duha ka sachet sa ginadudahang shabu nga adunay gibug-aton nga 0.55 gram ug 0.09 gram, usa ka giingong peke nga bulawan, cellphone, motorsiklo nga walay plaka, ug marked money nga gigamit sa operasyon.
Gidugang sa kapulisan nga gipahibalo ang mga suspek sa ilang mga katungod pinasikad sa balaod sa wala pa sila gidala sa Marilog Police Station alang sa dugang imbestigasyon ug pagproseso sa kaso.(Camille Santos Naraga)(Source: DCPO)