DAVAO DEL NORTE – Nasikop sa kapulisan ang usa ka 37-anyos nga lalaki nga nailhang alyas “Payat” atol sa gilusad nga buy-bust operation sa Philippine National Police – Tagum City Police Station sa Barangay La Filipina, Tagum City, alas 1:35 sa kaadlawon niadtong Mayo 20, 2026.
Base sa report, residente sa Barangay Madaum ang suspek ug nadakpan human mapalitan sa poseur buyer og usa ka pakete sa gidudahang shabu gamit ang ₱500 nga marked money ug pito ka peke nga ₱1,000 bills nga gigamit isip boodle money.
Dugang sa report, narekober usab gikan sa suspek ang lima pa ka pakete sa gidudahang shabu, usa ka .38 revolver nga adunay upat ka buhing bala, sling bag, ug usa ka Honda 125 XRM nga motorsiklo nga gigamit sa maong transaksyon.
Gibana-bana nga 13 gramos ang kabug-aton sa nakompiskang gidudahang droga nga adunay standard drug price nga mokabat sa ₱88,400.
Sa pagkakaron, gipriso na ang suspetsado sa kustodiya sa Tagum City Police Station samtang giandam ang kasong paglapas sa Comprehensive Dangerous Drugs Act of 2002 ug Comprehensive Firearms and Ammunition Regulation Act.(Camille Santos Naraga)(Source: PNP Tagum City Police Station)