DAVAO CITY — Nagkahiusa ang Davao City Police Office (DCPO) ug ang lokal nga kagamhanan sa Davao City sa pagpalig-on sa mga lakang sa seguridad alang sa umaabot nga Pasko ug Bag-ong Tuig.
Niadtong Disyembre 9, 2025, nakigtagbo si PCOL Mannan C. Muarip, Acting City Director sa DCPO, kang Acting City Mayor Sebastian Zimmerman Duterte aron hisgutan ang dugang nga police visibility, aktibong crime prevention, ug koordinadong deployment sa kapulisan sa mga hinungdanong lugar sa siyudad.
Tumong sa maong mga lakang nga masiguro ang kaluwasan sa mga residente ug bisita ilabi na sa mga lugar nga gipaabot ang dagsang tawo atol sa holiday season.
Atol sa miting, gipresentar usab ni PCOL Muarip ang unang edisyon sa opisyal nga publikasyon sa DCPO nga “The First 98 Days of Leadership,” nga nagpasundayag sa mga kalampusan ug reporma nga nahimo sulod sa iyang liderato.
Gipahayag sa DCPO ug Davao City LGU ang ilang hiniusang paningkamot sa pagmintinar sa kalinaw ug kahusay sa siyudad alang sa malinawon ug luwas nga selebrasyon sa holidays.(Camille Santos Naraga)(Source: Contributed)