DAVAO CITY – Gisiguro sa Davao City Police Office (DCPO), nga gipangulohan ni Acting City Director PCOL Mannan C. Muarip, ang luwas ug hapsay nga pag-obserba sa unang adlaw sa Misa de Gallo pinaagi sa pagpalig-on sa presensya sa pulisya ug istratehikong deployment sa mga personnel sa dagkong parokya sa siyudad.
Nakasakop sa seguridad ang 43 ka simbahan, lakip ang San Pedro Cathedral ug uban pang mayor nga parokya, diin gibanabana nga mitambong ang 45,980 ka katawhan sa pagsugod sa siyam ka adlaw nga tradisyon. Ang malinawon nga pagtigom nakab-ot pinaagi sa hugot nga koordinasyon sa DCPO, lokal nga kagamhanan, partner agencies, parish volunteers, ug komunidad.
Personal nga gisuperbisa ni PCOL Muarip ang mga patrol, gisusi ang security posts, ug gidumala ang mga yunit sa pagpahugot sa presensya sa pulisya, pagdumala sa trapiko, ug pagmatngon batok sa posibleng hulga. Gipalig-on niya ang dedikasyon sa DCPO sa pagpanalipod sa mga mananampalataya atol sa Misa de Gallo, ug gipahimangno nga ang kalinaw ug kahusay usa ka responsibilidad nga gipaambit sa mga kapulisan, lider sa simbahan, ug publiko. .(Camille Santos Naraga)(Source: Contributed)