Nasikop sa kapulisan ang usa ka 21-anyos nga construction worker nga giasoy nga nalambigit sa pagpamaligya og gidudahang shabu atol sa buy-bust operation nga gipahigayon sa Purok Mangga, Barangay San Miguel, Digos City, Davao del Sur, pasado alas 12:11 sa kaadlawon sa Hulyo 21.
Ang suspetsado, nga giila lamang sa alyas “Cio,” usa ka Street Level Individual (SLI), ulitawo ug residente sa Purok Narra, Barangay Zone 1 sa maong siyudad.
Gipahigayon ang operasyon sa mga operatiba sa Intelligence Unit ug City Drug Enforcement Unit (CDEU) sa Digos City Police Station ubos sa pagpanguna ni Police Major Richard B. Dumasig, pinaagi sa direktiba ni PLTCOL Norman L. Yparraguirre. Mitambong usab sa operasyon ang mga operatiba sa PDEA Davao del Sur, Provincial Drug Enforcement Unit (PDEU), ug mga personnel sa 1st Davao del Sur Provincial Mobile Force Company.
Narekober gikan sa suspetsado ang usa ka sachet sa gidudahang shabu nga gibaligya sa poseur-buyer, upat pa ka sachets nga adunay susamang substansiya, buy-bust money nga nagkantidad og ₱1,000, usa ka cellphone, pitaka, ug ₱150 nga cash.
Sumala sa Digos City Police Station, ang kinatibuk-ang gibug-aton sa mga nakumpiskang gidudahang shabu miabot sa 4.49 gramos, nga adunay gibanabanaang kantidad nga ₱30,532.00 base sa Standard Drug Price.
Gidala ang nadakpan sa Digos City Police Station alang sa hustong dokumentasyon ug pagproseso, samtang giandam na ang kasong paglapas sa Republic Act No. 9165 o Comprehensive Dangerous Drugs Act of 2002 batok kaniya.(Camille Santos Naraga)(Source: PNP Digos CPS)