DAVAO CITY – Usa ka lalaki nga giingong caretaker ang nasapwan nga patay ug puno sa dinuslakan sulod sa usa ka bodega sa Times Beach, Ecoland Drive, Matina Aplaya, Davao City, pasado alas-7:00 sa buntag karong December 5, 2025.
Giila ang biktima nga si Ramonito Arcenal Mandawe, 35 anyos, residente sa Seawall, Bucana, Davao City. Siya ang nagbantay sa maong bodega.
Base sa pahayag sa iyang kauban sa trabaho, iyang nakaplagan ang biktima nga nagbuy-od ug natabunan sa kaugalingong dugo, dihang misulod kini sa lugar. Duol sa patayng lawas, nakita usab ang usa ka hiniktang iring.
Sa inisyal nga imbestigasyon sa kapulisan, walay nawala sa mga gamit sa bodega. Apan gituohang pugos nga giablihan ang gate ug ang pultahan sa kwartong gi-ukupan sa biktima.
Personal grudge ang gitutokan nga anggulo sa pagpatay samtang padayon ang gihimong imbestigasyon.(Camille Santos Naraga)(Source: Contributed)