NAAngol ang usa ka pedikab driver human siya gidunggab sa iyang kapwa drayber kasunod sa panaglalis nga mitumaw gikan sa usa ka bangga sa Roxas Extension, duol sa PhilHealth Office sa Digos City, udto niadtong Hulyo 10, 2026.
Sumala sa inisyal nga impormasyon, nagsugod ang komosyon sa dihang kalit umanong ni-U-turn ang usa sa mga pedikab, hinungdan nga nabanggaan kini sa laing pedikab nga nagsunod.
Tungod sa aksidente, nagkasinumbagay ang duha ka drayber. Apan wala madugay, gituohang mikuha og usa ka hinagiban ang usa kanila gikan sa iyang pedikab ug gidunggab ang iyang kaatbang sa makadaghang higayon.
Tungod sa mga samad nga naangkon, gidali dayon og dala sa ospital ang biktima aron matambalan. Wala pa giklaro sa mga awtoridad ang kasamtangang kahimtang niini.
Padayon karon ang imbestigasyon sa kapulisan aron mahibal-an ang tibuok hitabo ug ang motibo sa pagdunggab, samtang giandam usab ang mga kasong ipasaka batok sa suspetsadong drayber.(Camille Santos Naraga)(Source: Contributed)