Gibuwag sa hiniusang pwersa sa Philippine Drug Enforcement Agency Regional Office 11 (PDEA RO11) ug National Bureau of Investigation Southeastern Mindanao Regional Office (NBI SEMRO) ang usa ka gituohang drug den nga naglihok sulod sa usa ka bar sa Sales Street, Barangay 27-C, Davao City, atol sa buy-bust operation alas 2:40 sa kadlawon niadtong Hulyo 11.
Ang operasyon nagsugod sa pagdakop sa target nga giila sa alyas “DJ Kar,” 26 anyos ug disc jockey, nga gituohang nakabaligya og usa ka sachet nga adunay upat ka gidudahang MDMA o ecstasy ngadto sa usa ka poseur-buyer sa kantidad nga ₱14,000.
Human sa transaksyon, gisulong sa mga operatiba ang maong bar diin gidakop usab ang giingong maintainer sa drug den ug tag-iya sa establisemento nga giila sa alyas “Edward.” Nadakpan usab ang tulo ka mga empleyado nga sila alyas “Ryan,” “Harvey,” ug “Raul,” lakip ang unom ka giingong kostumer nga giila sa mga alyas “Vince,” “Nathan,” “Agatha,” “Destin,” “Marl,” ug “Kaito.”
Sa pag-inspeksyon sa lugar, narekober sa mga awtoridad ang 65 ka marijuana vape cartridges, duha ka 500-milliliter nga botelya nga adunay gidudahang diluted ecstasy, nagkalain-laing drug paraphernalia, ug ang marked buy-bust money nga gigamit sa operasyon.
Sumala sa PDEA, mokabat sa ₱255,000 ang gibanabanang kantidad sa tanang gidudahang ilegal nga droga nga nasakmit.
Gidala ang mga nadakpan sa kustodiya sa PDEA alang sa hustong dokumentasyon ug pagpasaka sa mga kasong paglapas sa Republic Act No. 9165 o Comprehensive Dangerous Drugs Act of 2002.(Camille Santos Naraga)(Source: PDEA XI)