DAVAO CITY – Nadakpan sa mga operatiba sa Police Station 18-Bajada ang usa ka lalaki nga nailhang si alyas “Demonyo” atol sa buy-bust operation nga gilusad alas 12:41 sa kaadlawon sa Hunyo 10, 2026.
Sumala sa kapulisan, nasakmit gikan kang alyas Demonyo ang gituohang shabu nga adunay gibanabang standard drug price nga P884,000.
Nasikop usab ang iyang kauban nga si alyas “Melchor,” nga sama kaniya nagpuyo sa Fortune Street, Sta. Cruz, Barangay Leon Garcia, Agdao District, Davao City, diin gihimo ang operasyon.
Narekober sa mga awtoridad ang daghang transparent plastic sachet nga adunay gituohang shabu ug uban pang ebidensya. Giingong gihimo ang imbentaryo sa mga nakompiska nga butang uban sa presensya sa mga saksi ug subay sa mga probisyon sa balaod, atubangan mismo sa mga suspek sa lugar sa operasyon.
Padayon ang imbestigasyon sa kapulisan batok sa mga nadakpan alang sa posibleng paglapas sa balaod kontra ilegal nga droga. .(Camille Santos Naraga)(Source: Contributed)