DAVAO CITY — Opisyal nang gipahatod sa usa ka madasigon nga send-off program ang 632 ka mga student-athletes gikan sa tibuok Davao Region nga moapil sa umaabot nga national sports meet sa Agusan del Sur.
Gipahigayon ang maong programa sa Mintal Elementary School sa Mintal, Davao City diin gipakita ang suporta ug pagdasig alang sa mga atleta nga magrepresentar sa Davao Regional Athletic Association o DavRaa.
Nag-una sa delegasyon ang 253 ka elite student-athletes gikan sa Davao City nga kabahin sa 632 ka miyembro sa regional delegation.
Mitambong usab sa maong kalihokan ang mga opisyal sa Department of Education Region XI nga gipangulohan ni Regional Director Allan Farnazo, uban sa mga Schools Division Superintendents ug Assistant Schools Division Superintendents aron maghatag og suporta ug inspirasyon sa mga atleta sa dili pa ang nasudnong kompetisyon.
Gikatakdang mobiyahe ang delegasyon niadtong Mayo 18, 2026 padulong sa Agusan del Sur diin pagahimoon ang national sports meet gikan Mayo 24 hangtod Mayo 31, 2026.
Gilauman nga mapakita sa mga atleta sa Davao Region ang ilang talento, disiplina, ug determinasyon sa pagrepresentar sa rehiyon sa nasudnong entablado sa sports.(Camille Santos Naraga)(Source: DepEd Davao City)