CARMEN, Davao del Norte — Nasikop sa kapulisan ang usa sa Top 5 Most Wanted Person sa municipal level atol sa operasyon nga gihimo alas 9:25 sa buntag niadtong Mayo 17, 2026, sa lungsod sa Carmen.
Ang nadakpan giila lamang sa alyas nga “Vin,” residente sa Carmen, Davao del Norte. Ang operasyon gipahigayon sa Carmen Municipal Police Station ubos sa liderato ni PMAJ Lope I. Cebreros III, Chief of Police, uban sa mga personnel gikan sa 2nd Davao del Norte Provincial Mobile Force Company ug R-PSB Team 2.
Base sa report sa kapulisan, ang pagdakop gibase sa Warrant of Arrest batok sa suspetsado tungod sa kasong Lascivious Conduct ubos sa Section 5(b) sa Republic Act 7610 o ang Special Protection of Children Against Abuse, Exploitation and Discrimination Act. Adunay gitakdang piyansa alang sa maong kaso.
Matud pa sa mga otoridad, gigamit usab sa mga operatiba ang alternative recording device atol sa pagsilbi sa warrant isip kabahin sa standard operating procedure sa operasyon.
Human sa pagdakop, gidala ang suspetsado sa Carmen District Hospital alang sa pisikal ug medikal nga eksaminasyon sa wala pa ibalhin ngadto sa kustodiya sa Carmen Municipal Police Station diin padayon karon ang legal nga proseso. (Camille Santos Naraga)(Source: Contributed)