Nasakmit ug gi-impound sa mga otoridad ang unom ka motorsiklo human madakpan ang mga drayber nga giingong naglumba og ilegal sa National Highway sa Barangay Canocotan, Tagum City.
Gipahigayon ang operasyon sa Traffic Section sa Tagum City Police Station isip kabahin sa padayon nga kampanya batok sa mga paglapas sa balaod sa trapiko ug aron mapreserbar ang kalinaw ug kaluwasan sa kadalanan. Ang operasyon gihimo ubos sa direktiba ni PLtCol. Edgardo G. Bahan, Officer-in-Charge sa Tagum City Police Station.
Sumala sa kapulisan, unom ka mga indibidwal ang giingong nalambigit sa ilegal nga drag race nga maoy paglapas sa Republic Act 4136 o Land Transportation and Traffic Code. Giisyuhan sila og citation tickets, samtang ang uban nakadawat usab og Temporary Operator’s Permit (TOP).
Ang mga motorsiklo gidala sa Land Transportation Office (LTO) Impounding Area alang sa hustong proseso ug disposisyon.
Gipasiugda ni PLtCol. Bahan nga magpadayon ang kapulisan sa pagpatuman sa balaod batok sa illegal drag racing aron malikayan ang mga aksidente ug mapanalipdan ang kinabuhi sa mga motorista, pasahero, ug pedestrian.(Camille Santos Naraga)(Source: PNP Tagum CPS)