DAVAO CITY – Usa ka sunog ang misiklab sa Building 2 sa Toril Public Market, makeshift section sa Toril Proper, Davao City sa kaadlawon sa Hulyo 26.
Sumala sa Bureau of Fire Protection (BFP), unang nareport ang insidente alas 2:15 sa kaadlawon ug dali kining girespondihan sa mga bombero. Alas 3:03 sa kaadlawon, gideklarang “under control” ang sunog ug alas 3:42, gideklarang “fire out.”
Base sa report sa BFP, 32 ka mga stall ang hingpit nga naabugan sa sunog samtang upat pa ang bahagyang nadaot. Wala may na-report nga samaran o namatay sa insidente.
Sa paunang imbestigasyon sa Toril Police Station 8, usa ka matadero nga nailhan nga si Bryan Ortega, 38 anyos, ang unang nakamatikod og aso nga nagagikan sa stall nga giabangan sa usa ka negosyante kang Arcily Umboy. Sa iyang pagsusi sa lugar, kalit nga misilaob ang kalayo busa nangayo siya og tabang.
Si Jean Claude Van Rosales, 34 anyos, nga encoder sa merkado, ang nakatawag dayon og tabang sa Central 911 nga hinungdan sa paspas nga pagresponde sa mga bombero.
Padayon pa ang imbestigasyon sa mga otoridad aron matino ang hinungdan sa sunog ug matantiya ang kantidad sa kadaot.(Camille Santos Naraga)(Source: Contributed)