Misaka na sa 13 ka mga tawo nga nag-atubang og kaso kalabot sa nadiskubrehan nga scam hub sa I.T. Park, Cebu City human nga unom pa ka dugang suspek ang gipasakaan og reklamo sa piskaliya.
Gipahibalo sa Regional Anti-Cybercrime Unit 7 (RACU 7) nga ang reklamo batok sa unom ka bag-ong suspek gisumite na sa Office of the City Prosecutor sa Guadalupe, Cebu City sa alas 4:00 sa hapon niadtong Hulyo 25, 2025. Ang operasyon gipangulohan ni PLTCOL Jumark Caña, ubos sa pagdumala ni PLTCOL Wilfredo Velayo Jr., Officer-in-Charge sa RACU 7.
Ang mga suspek nga nailhan sa alyas nga Smakdat, Dan, Tony, Ann, Nav, ug Jessa giakusahan nga nalambigit sa online investment scam nga nakapanikas sa daghang tawo. Gipasanginlan sila nga nakalapas sa Section 11 sa Republic Act 11765 (Financial Products and Services Consumer Protection Act) ug Section 6 sa Cybercrime Prevention Act of 2012 (RA 10175).
Ang maong reklamo gisang-at ubos sa WSSECD No. 0520-05-2625-07 pinaagi sa Cebu Provincial Cyber Response Team ug gimandoan ni Hon. James Stewart Ramon E. Himalaloan, Presiding Judge sa RTC Branch 7 sa Cebu City.
“Cyber scammers have no place in Central Visayas. We will find them, charge them, and protect our people,” segon ni PBGEN Redrico A. Maranan, Regional Director of PRO7.
Nahinumduman nga unang gisang-at ang kaso batok sa usa ka suspek niadtong Hulyo 4, sunod ang tulo niadtong Hulyo 11, ug laing tulo pa niadtong Hulyo 18. Karon nga nadugangan og unom, 13 na kabuok ang gitumbok sa maong cyber fraud nga kaso.
Nagpadayon ang imbestigasyon ug gi-awhag gihapon sa mga otoridad ang publiko nga magmatngon ug mosumbong dayon sa kapulisan kung adunay mga kadudahang online investment offers.
Source: PRO7
I via Renante Socia Lada
#rpndykccebu
#675hzamband
#tandemexpress