DAVAO CITY – Gipusil ang usa ka lalaki nga nangilog og kanta sa karaoke sa Expensive Candy Bar sa Purok Bayanihan, Magugpo West, Tagum City kaganinang ala-1:45 sa kaadlawon, Disyembre 1, 2025.
Giila ang biktima nga si Christian Seguira, 25 anyos, ulitawo, harvester ug residente sa Upper Sudlon, Barangay Central, Mati City, Davao Oriental.
Sumala sa report sa Tagum PNP, miguwa sa imbestigasyon nga ang insidente nasugdan sa dihang nasuko ang suspek nga nag-inom sa pikas lamesa human giilog matod sa biktima ang kanta nga iyang gipili sa karaoke. Sa dihang milakaw na ang suspek, kalit lang mibunlot sa iyang armas ug gipusil si Seguira.
Daling gidala ang biktima sa Davao Regional Medical Center, diin nakaangkon siya og samad pinusilan sa suwang ug padayon nga gi-obserbahan.
Nasamsam sa crime scene ang usa ka basiyong bala gikan sa .45 caliber pistol. Ang kapulisan nagpadayon sa dugang imbestigasyon aron matukoy ug madakpan ang suspek.(Camille Santos Naraga)(Source: Contributed)