Naluwas sa mga personahe sa Coast Guard Station (CGS) Davao Occidental ang 20 ka mga indibidwal nga naglutaw-lutaw sa dagat human kalit nga maunlod ang ilang gisakyang motorbanca sa baybayon sa Jose Abad Santos, Davao Occidental.
Sumala sa inisyal nga report, ang maong insidente nahitabo atol sa ilang biyahe padulong sa laing destinasyon. Sa wala damhang hinungdan, misugod og lusot sa tubig ang maong motorbanca hangtod kini nalunod. Dali nga mitubag ang mga sakop sa Philippine Coast Guard (PCG) ug uban pang mga volunteer human madawat ang tawag sa emerhensiya.
Dako usab ang natabang sa MBCA LGU Sarangani nga misanong sa operasyon sa pagluwas. Ang tanang biktima dali nga gidala sa CGSS Jose Abad Santos aron masiguro ang ilang kahimtang ug hatagan dayon og medical assistance kung gikinahanglan.
Wala may naiulat nga grabeng kadaot o casualty sa insidente. Padayon nga ginasusi sa mga otoridad ang hinungdan sa pagkahugno sa maong sakayan.(Camille Santos Naraga)(Source: Contributed)