MONTEVISTA, Davao de Oro – Nasikop sa hiniusang operasyon sa Philippine Drug Enforcement Agency (PDEA)-XI ug Philippine National Police (PNP) ang usa ka 33-anyos nga lalaki nga nailhang alyas “Adrian” atol sa drug bust operation sa Purok 5, Barangay Banagbanag, Montevista, Davao de Oro niadtong Sabado sa kaadlawon, Hulyo 18, 2026.
Base sa report sa PDEA-XI, nadakpan ang suspetsado human niya giingong gibaligya ang usa ka sachet nga adunay sulod sa gituohang shabu nga gibanabanang kantidad og ₱7,000 ngadto sa poseur-buyer.
Human sa pagdakop, narekober pa sa mga operatiba ang dugang nga 51 ka gramo sa gituohang shabu nga adunay gibanabanang kantidad nga ₱346,000, nga nagdala sa kinatibuk-ang balor sa nakumpiskang gituohang ilegal nga droga ngadto sa ₱353,000.
Ang suspetsado anaa na karon sa kustodiya sa mga otoridad ug giandam ang kasong paglapas sa Republic Act 9165 o Comprehensive Dangerous Drugs Act of 2002.(Camille Santos Naraga)(Source: PDEA-XI)