Nagpahigayon og school engagement, information drive ug feeding program ang Revitalized Pulis sa Barangay o R-PSB Team sa Situbu National High School niadtong Hulyo 17 aron mapalig-on ang panag-uban tali sa kapulisan ug komunidad sa edukasyon.
Sa pakigtambayayong sa Cympil Situbo Alsa Farmers Association ug ubos sa pagpangulo ni Police Lieutenant Colonel Edwin D. Verzon, gihatagan og impormasyon ang mga estudyante bahin sa anti-bullying, pagpugong sa ilegal nga droga ug responsableng pagkamamumuo isip kabahin sa kampanya sa kapulisan alang sa luwas nga palibot sa eskwelahan.
Gipahigayon usab ang feeding program aron masuportahan ang panglawas ug kaayohan sa mga estudyante, samtang gipadayag ang pagpakabana sa kapulisan ug sa mga kaabag niini sa komunidad.
Gilauman sa Zamboanga del Norte 2nd Provincial Mobile Force Company nga pinaagi sa padayon nga mga programa sa eskwelahan, mas mapalig-on ang kahibalo, disiplina ug panagtambayayong sa kabatan-onan ug komunidad.(JENIFFER JR. DELICA)
Source: PNP Zamboanga del Norte 2nd PMFC