Pormal nang gipasakaan og kaso sa Cebu City Police Office (CCPO) ang mga suspetsadong nalambigit sa giingong kidnapping incident nga nahitabo sa Miranza Center sa Barangay Banilad, Cebu City niadtong Mayo 11, 2026.
Sumala sa CCPO, dali nilang gihimo ang imbestigasyon ug case build-up operation human sa insidente. Tungod niini, nailhan sa kapulisan ang unom ka mga suspetsado ug lima pa ka wala mailhing tawo o “John Does” nga giingong direktang nalambigit sa krimen.
Gituohang nagsugod ang insidente tungod sa usa ka transaksiyon sa pagbaligya og sakyanan nga giapilan sa mga partido. Atol sa imbestigasyon, narekober usab sa mga otoridad ang usa ka Nissan Terra nga giingong gigamit sa usa sa mga suspetsado ug nahimong kabahin sa ebidensiya sa kaso.
Niadtong Mayo 28, 2026, pormal nga gipasaka sa kapulisan ngadto sa Office of the City Prosecutor sa Cebu City ang reklamong paglapas sa Article 267 sa Revised Penal Code o Kidnapping ug Serious Illegal Detention nga may kalabutan sa kasong Robbery.
Matud sa CCPO, ang pagpasaka sa kaso nagpakita sa ilang padayong paningkamot sa pagsiguro nga manubag ang mga responsable sa seryosong mga krimen ug mapadayon ang kalinaw ug kahapsay sa komunidad. Naghangyo usab sila sa publiko nga magtinabangay pinaagi sa paghatag og impormasyon aron madakpan ang ubang mga suspek nga wala pa masikop.
📸 CCPO
I via Renante Socia Lada