Mati City, Davao Oriental – Malampusong gipahigayon ang usa ka buy-bust operation sa mga ahente sa Davao Oriental Provincial Office sa Philippine Drug Enforcement Agency (PDEA) Regional Office 11, kauban ang Police Regional Office 11, Davao Oriental Police Provincial Office, Mati City Police Station, Philippine Coast Guard, ug Philippine Navy, niadtong Hunyo 3, 2025, alas 9:25 sa gabii, sa MLGR, Barangay Central, Mati City.
Ang suspek nga nailhan sa alyas “Jay,” 46 anyos, minyo, ug residente sa Barangay Libertad, Butuan City, nadakpan sa pagbaligya og usa (1) ka heat-sealed nga transparent plastic sachet nga adunay sulod nga gituohang shabu nga nagkantidad og ₱3,000 ngadto sa usa ka undercover agent nga nagpakaaron-ingnon nga poseur buyer.
Gikumpiska usab sa operasyon ang lima (5) ka heat-sealed plastic sachets nga adunay gituohang shabu nga gibana-banang 503 ka gramo ang gibug-aton ug adunay street value nga ₱6,036,000, apil ang marked money nga gigamit sa operasyon.
Giandam na ang mga kasong kriminal batok sa suspek ilawom sa Republic Act No. 9165, o ang Comprehensive Dangerous Drugs Act of 2002. (Camille Santos Naraga)(Source: Contributed)