Davao City – Naaresto ang usa ka lalaki sa gihimong buy-bust operation sa Philippine Drug Enforcement Agency (PDEA) Regional Office XI human siya mabaligya og gituohang marijuana nga nagkantidad og ₱20,000, niadtong Hunyo 3, 2025, bandang alas 4:45 sa hapon.
Base sa ulat sa PDEA-XI, gihimo ang operasyon sa Ricardo Street, Juna Subdivision, Barangay 76-A, Davao City. Nasikop ang suspetsadong si alyas “Kurt,” 24 anyos, human mabaligya og usa ka brick sa gituohang marijuana ngadto sa undercover agent.
Dugang pa, nakuhaan usab ang suspek og napulo (10) ka vacuum-sealed nga pakete sa gituohang marijuana nga gibana-banang mobalor og ₱80,000.
Gisignit usab ang motorsiklo nga gigamit sa suspek sa pagpahigayon sa ilegal nga transaksiyon.
Gibanabana nga ang tanang nakuha sa operasyon may kabuuang kantidad nga ₱100,000.
Ang operasyon gipahigayon sa kooperasyon sa Philippine Coast Guard ug Ecoland Police Station 15 sa Davao City.(Camille Santos Naraga)(Source: Contributed)