Nabunturan, Davao de Oro – Usa ka malampusong drug buy-bust operation ang gipahigayon sa Nabunturan Municipal Police Station nga gipanguluhan ni PCPT Jandy Lou Esteban, Deputy Chief of Police, ubos sa pangulo ni PLTCOL Eduard B. Jungco, Chief of Police. Ang operasyon gihimo uban sa pakig-alayon sa 1101st MC RMFB 11 ug PDEU DDOPPO.
Ang maong operasyon nga gihimo ubos sa PDEA Coordination and Control No. 30004-052025-0674 miresulta sa pagdakop sa usa ka suspek nga nailhan sa alyas “DOL,” 31 anyos, residente sa Purok 14, Barangay Poblacion, Nabunturan, Davao de Oro.
Nasakmit gikan sa suspek ang gituohang shabu nga gibana-banang 1 gramo ang gibug-aton ug adunay street value nga PHP 6,800.00. Ang imbentaryo ug pagmarka sa mga ebidensya gihimo diha-diha dayon sa lugar sa insidente, atubangan sa suspek ug sa mga giimbitar nga saksi, subay sa gikinahanglan sa balaod.
Padayon ang pasalig sa Nabunturan PNP sa pagpanguna sa mga operasyon batok sa ilegal nga droga, aron mapalig-on ang seguridad ug kalinaw sa komunidad.(Camille Santos Naraga)(Source: Contributed)