Dako nga kantidad sa gidudahang gold ore ug mga kagamitan sa pagmina ang nakumpiska sa hiniusang anti-illegal mining operation sa mga awtoridad sa Barangay Araibo, Pantukan, Davao de Oro, nga misangpot usab sa pagdakop sa kapin 30 ka mga suspetsado niadtong Hulyo 7, 2026.
Base sa report sa kapulisan, narekober sa operasyon ang 128 ka sako sa gidudahang gold ore, usa ka Isuzu ELF truck, lainlaing kagamitan nga gituohang gigamit sa ilegal nga pagmina, ug mga armas. Gibanabana sa ₱5.54 milyon ang kinatibuk-ang kantidad sa mga mineral ores ug ekipo nga nakumpiska.
Nagpadayon ang follow-up operation sa maong lugar nga misangpot pa sa pagdakop sa tulo ka dugang nga mga suspetsado. Narekober usab sa mga operatiba ang tulo ka armas sa kalayo uban sa mga bala.
Gikustodiya na sa CIDG Davao de Oro ang tanang nadakpan alang sa hustong dokumentasyon ug pagproseso sa mga kasong ipasaka batok kanila.
Samtang, gitugyan na sa Mines and Geosciences Bureau (MGB) Region XI ang mga nakumpiskang mineral ores ug kagamitan alang sa angay nga disposisyon ug dugang imbestigasyon.
Padayon ang panawagan sa mga awtoridad batok sa ilegal nga pagmina ug gipasiugda ang lig-on nga pagpatuman sa mga balaod aron mapanalipdan ang kalikupan ug natural nga kahinguhaan.(Camille Santos Naraga)(Source: PNP)