Nangandam ang Gobyerno sa Lalawigan sa Sugbo sa pagpahigayon og sunod-sunod nga libreng surgical mission karong Agosto ug Setyembre isip kabahin sa pagsaulog sa founding anniversary sa probinsya. Magtinabangay ang Capitol, mga pribadong ospital, ug mga boluntaryong doktor alang niini.
Niadtong Hulyo 8, gipangunahan ni Capitol Public Health Consultant Dr. Nikki Catalan ang usa ka koordinasyon nga tigum uban sa mga representante sa Chong Hua Hospital, Cebu Medical Society, mga opisyal sa lokal nga panggamhanan, municipal health officers, ug Board Member Mike Villamor.
Gihisgutan sa tigum ang hustong pag-andam sa surgical mission aron masiguro nga luwas ang matag operasyon. Lakip niini ang pagpili sa mga kwalipikadong pasyente, pagkompleto sa medical team, ug pag-andam sa tanang kinahanglanong suporta.
Gipasalamat ni Dr. Catalan ang tanang ospital, mga doktor, ug lokal nga mga opisyal nga nagtinabangay aron masiguro nga ang surgical missions mapahigayon sa hapsay, luwas, ug makahatag og dako nga tabang sa mga benepisyaryo.
I via Renante Socia Lada