Nasikop sa kapulisan ang usa ka 29-anyos nga lalaki nga nailhang alyas “Joseph” atol sa buy-bust operation nga gihimo sa Barangay Cuambugan, Tagum City niadtong alas 10:47 sa gabii.
Base sa imbestigasyon, residente ang suspetsado sa Barangay San Jose, Sto. Tomas, Davao del Norte, apan temporaryong nagpuyo sa Tagum City.
Narekober sa mga operatiba gikan sa iyang posesyon ang unom ka sachet nga adunay sulod sa gituohang shabu, usa ka improvised glass tube o tooter, coin purse, marked buy-bust money, ug usa ka Suzuki Raider 150 nga gituohang gigamit sa iyang ilegal nga kalihokan.
Gikatahong mokabat sa lima ka gramo ang timbang sa tanang nakumpiskang gituohang shabu nga adunay banabana nga kantidad nga ₱34,000.
Gidala na sa Tagum City Police Station ang suspetsado alang sa hustong dokumentasyon ug pagpasaka sa kasong paglapas sa Sections 5 ug 11 sa Republic Act 9165 o ang Comprehensive Dangerous Drugs Act of 2002.(Camille Santos Naraga)(Source: PNP Tagum City Police Station)