Nasikop sa mga operatiba sa New Corella Municipal Police Station ang usa ka 27-anyos nga lalaki nga nailhang alyas “Poy” atol sa gilusad nga buy-bust operation sa Purok 10, Barangay Del Pilar, New Corella, Davao del Norte niadtong Hulyo 13.
Ang operasyon gipahigayon sa Station Drug Enforcement Unit (SDEU) ubos sa pagpanguna ni PMaj. David S. Ybalio Jr., uban sa suporta sa mga sakop sa 1st Davao del Norte Provincial Mobile Force Company ug adunay balidong PDEA Pre-Operation Authority ug Tip Information Report (TIP).
Narekober gikan sa suspetsado ang usa ka sachet sa gituohang shabu nga napalit sa poseur-buyer, tulo pa ka dugang sachet sa maong ilegal nga droga, ug ang marked money nga gigamit sa operasyon.
Gibana-bana nga 0.4 gramos ang gibug-aton sa tanang nakumpiskang gituohang shabu nga adunay estimadong kantidad nga ₱2,560.
Human sa operasyon, gihimo sa mga otoridad ang husto nga pagmarka, pag-inventory, ug pagdokumento sa mga ebidensya subay sa gitakdang pamaagi ug atubangan sa mga gikinahanglang saksi.
Ang suspetsado anaa na sa kustodiya sa New Corella Municipal Police Station ug nag-atubang og kasong paglapas sa Republic Act 9165 o ang Comprehensive Dangerous Drugs Act of 2002.(Camille Santos Naraga)(Source: PNP New Corella MPS)