Nag-anunsyo ang Tagum City Police Station (CPS) nga adunay kinatibuk-ang ₱150,000 nga reward alang sa bisan kinsang makahatag og kasaligan nga impormasyon nga mosangpot sa pag-ila ug pagdakop sa mga suspek nga naglungkab sa usa ka iPhone store sa Briz District, Barangay Magugpo East, Tagum City.
Sumala kang PLtCol. Edgardo G. Bahan, Officer-in-Charge sa Tagum CPS, maghatag si Mayor Rey T. Uy og ₱50,000 nga pahalipay alang sa makahatag og mapuslanong impormasyon sa maong kaso.
Dugang pa, ang tag-iya sa gitulis nga tindahan naggahin usab og ₱100,000 nga reward, hinungdan nga misaka sa ₱150,000 ang kinatibuk-ang ganti.
Base sa imbestigasyon, klarong nakuhanan sa CCTV footage ang tulo ka mga lalaki nga gituohang responsable sa pagpanglungkab sa tindahan niadtong kaadlawon sa Hunyo 24.
Padayon ang imbestigasyon sa kapolisan aron mailhan ug madakpan ang mga suspek ug mapanubag sila sa balaod.(Camille Santos Naraga)(Source: Tagum City Police Station)