Nasakmit sa kapulisan ang gibanabana nga 450 gramos nga gituohang shabu nga adunay kantidad nga kapin ₱3.06 milyon ug nadakpan usab ang usa ka babayeng suspetsado atol sa anti-illegal drugs operation sa Barangay Guadalupe, Cebu City kagabii sa Hunyo 23, 2026.
Gipahigayon ang operasyon sa Station Drug Enforcement Team (SDET) sa Police Station 9 ubos sa pagmando ni PCPT Gabriel Pasilan Mota, sa pakigtambayayong sa Philippine Drug Enforcement Agency (PDEA) ug sa Counter-Intelligence Unit (CIU) sa Cebu City Police Office.
Base sa imbestigasyon, nasikop ang suspetsado human masakpan nga nagkupot ug gituohang nagbaligya og ilegal nga drogas, nga maoy paglapas sa Republic Act 9165 o Comprehensive Dangerous Drugs Act of 2002.
Gibutang karon sa kustodiya sa Police Station 9 ang suspetsado samtang giandam sa mga otoridad ang pagpasaka sa kaso batok kaniya.
Sumala sa Cebu City Police Office, ang maong operasyon kabahin sa ilang padayong kampanya batok sa ilegal nga drogas aron mapugngan ang pagkatag niini sa siyudad.
I via Renante Socia Lada