Duha ka indibidwal ang nadakpan sa kapulisan human sa malampusong buy-bust operation nga gihimo sa Barangay New Visayas, Panabo City, alas 4:33 sa hapon niadtong Hunyo 24, 2026.
Ang mga suspek, nga giila lamang sa mga alyas nga “J-Boy” ug “Mariel,” nasikop human gibaligyaan nila og ginadudahang shabu ang usa ka poseur buyer.
Ang operasyon gipahigayon sa Panabo City Police Station ubos sa pagpanguna ni PLTCOL Dexter R. Cuevas, sa pakigtambayayong sa 2nd Davao del Norte Provincial Mobile Force Company (DNPMFC) ug sa koordinasyon sa PDEA Davao del Norte.
Narekober sa mga otoridad ang tulo ka sachet sa ginadudahang shabu nga adunay gibanabanang gibug-aton nga 0.35 gramos ug kantidad nga ₱2,380, sumala sa Standard Drug Price.
Ang usa sa mga nadakpan usa ka 27 anyos nga residente sa Barangay New Visayas, Panabo City, samtang ang ikaduha usa ka 26 anyos nga residente sa Carmen, Davao del Norte.
Ania na karon sa kustodiya sa Panabo City Police Station ang mga suspek ug giandam na ang kasong paglapas sa Republic Act No. 9165 o ang Comprehensive Dangerous Drugs Act of 2002 batok kanila.(Camille Santos Naraga)(Source: PNP Panabo CPS)