Iriga City — Mamundong ibinareta kasu-bangui ni Cong. Lray Villafuerte kan Segundo distrito kan CamSur an biglaan na pamama-aram sa kinaban kan saiyang ama na si dating Gobernador Luis R. Villafuerte Sr., kasabay kan pagladawan kaini nin saro sa hinahangaan asin binibistong politico sa nasyon.
An binibistong kingpin kan politica sa rehiyon, nama-aram mientras na binubulong sa St. Lukes Medical Center alas 12:35 nin aga kasu-bago Septiembre 9, 2021 sa dai na binanggit na mati sa edad na 86 anyos.
An gurang na Villafuerte, inot na nagserbi bilang Assemblyman kan 1978-1986 kan dating Batasang Pambansa, dating Ministro kan DTI kan panahon ni defuntong Pres. Marcos asin dating Secretary kan Government Reorganization kan panahon ni dating Pres. Cory Aquino, saro sa pinakahalawig na nagserbing Gobernador kan Camarines Sur sa laog nin 15 ng taon asin nagserbing tulong sunod na termino bilang kongresista kan Segundo distrito kan apat pa sana an distrito kan probinsya.
Binayaan kan dating gobernadora an saiyang agom na si Mrs. Nelly Favis Villafuerte, mga aki na sinda Mariano Jose, Mylene, Lalaine, Maria Rita, Lori Lisa and Luis Raymund Jr. mga makuapo asin mga tugang na sinda Luisa, Carmen asin Lina.
