Gisugdan na sa pagkomponi sa Provincial Engineering Office sa Zamboanga del Norte ang dalan sa Sitio Sibugay, Barangay Diwan sa dakbayan sa Dipolog nga sige rang gisukod sukod sa panahon sa kanhi gobernador sa saad nga ayohon.
Usa sa molopyo sa nasangpit nga sitio nga si Elmer Basong mipadayag sa iyang dakung pagpasalamat ngadto kang Governor Rosalina “Nanay Nene” Jalosjos gipakomponi ang ilang dalan sa Sitio Sibugay nga modugtong sa Barangay Seres sa lungsod sa Katipunan ning lalawigan.
Matud pa niya sulod na sa taas nga panahon nga gisaad ni kanhi Governor Roberto Uy nga ipa-ilawom sa pagkomponi ang nasangpit nga dalan apan wala gayud mahatagi ug katumanan.
Gisaysay ni Basong nga ang mga ginsakupan sa kanhi gobernador sige ra nga nagsukod sukod sa nasangpit nga dalan kay ipa-ilawom sa pagkomponi apan wala gayud maimplementar.
Sumala pa niya ang mga katawhan sa ilang sitio gikapoy na sige ug lantaw sa mga tawo ni Berto nga magsige ra ug sukod sukod sa ilang dalan apan walay nahimong agi.
Sa nasayran ang nasangpit nga dalan unang gikonstrak ni kanhi Governor Uy samtang mayor pa siya sa dakbayan sa Dipolog.
Apan sukad sa pag-abli sa maong dalan wala na kini makatilaw ug pagkomponi.
Matud pa sa maong lungsuranon sa nagsingabot pa ang eleksiyon sa barangay sa nakalabay nga tuig una nang gipa komponi ni Governor Nanay Nene Jalosjos ang nasangpit nga dalan apan wala mahingpit kay naabtan sa election ban.
Sa nakita taas taas na ang nahimong agi sa Provincial Engineering sa pagkomponi karon sa nasangpit nga dalan.
Gisaysay niya nga ang nasangpit nga dalan mahinungdanon kaayo kay mismo ang mga molopyo sa Barangay Seres sa Katipunan diha na interesado moagi dala sa ilang mga produkto sa umahan paingon sa sentro sa dakbayan sa Dipolog kay mas duol kon moagi pa sila sa Barangay Dicayo.
Si Basong midugang sa pagsaysay nga sa dayong eleksiyon sa tuig 2022 si kanhi Governor Uy nagpadala ug mga ginsakupan kay gisukod na pod ug balik ang dalan sa pasalig nga kini ipa-ilawom sa pagkomponi apan walay nahitabo.
Samtang si Barangay Kapitan Rosebeth Bagarinao-Torno nagpasalamat ngadto kang Governor Nanay Nene Jalosjos nga gihatagan ug tubag ang hangyo sa ilang barangay.
Matud pa niya human sa eleksiyon sa barangay sa nakalabay nga tuig ang Sangguniang Pambarangay sa Barangay Diwan mipanday ug managkaluhang resolusyon nga naghangyo sa kagamhanang lokal sa dakbayan sa Dipolog ug kang Governor Nanay Nene Jalosjos sa pagkomponi sa nahisgutang dalan.
Ang ilang hangyo matud pa ni Kapitan Torno positibong gitubag sa gobernador kinsa nagpadala gilayon ug mga ekipo para sa pagkomponi sa nahisgutang dalan sa ilang barangay.
Sumala pa niya sukad nga nakonstrak ang maong dalan kapin na sa 20 ka tuig ang nakalabay wala gayud kini makatilaw ug pag-atiman aron ikomponi.
Dunay mga higayon nga kini gisugdan sa pagtrabaho apan dili mahuman.
Si Kapitan Torno midugang sa pagpahayag nga ang nasangpit nga dalan mahinungdanon kaayo ilabi na diha sa pagdala sa mga produkong agrikultura paingon sa merkado.
Gisaysay sa kapitan sa Barangay Diwan nga sulod na sa makadaghang higayon sila mihangyo sa kagamhanang lokal sa Dipolog para sa pagkomponi sa nasangpit nga dalan apan wala gayud mahatagi ug pagtagad.
Gikonpirmar usab ni Kapitan Torno nga sa dihang gisugdan na sa pagtrabaho sa Provincial Engineering ang nahisgutang dalan mga tinugyanan gikan sa kagamhanang lokal sa Dipolog miduol kaniya ug mi-awhag nga paundangon ang pagtrabaho sa probinsiya kay ang siyudad ra maoy mohimo sa pagkomponi.
Si Governor Nanay Nene Jalosjos pinaagi sa iyang tigpamaba si Atty. Ivan Patrick Ang mipahayag nga gawas sa pagkomponi sa nasangpit nga dalan adunay plano ang gobernador nga kini ipa kongkreto.
Ang nasangpit nga rehabilitation sa dalan sa Barangay Diwan personal nga gipasubay sa gobernador pinaagi sa iyang tigpamaba aron sa pagsiguro nga mapa-ilawom sa hingpit nga pagkomponi ang dalan sa Sitio Sibugay sa Barangay Diwan. (Angelica T. Obina)
(Source: Atty. Ivan Ang)