Cebu City – Dili mangabli sa tuig-tingtungha 2020-2021 ang walo ka gagmay ug pribadong eskuylahan sa tunga-tungang Kabisay-an taliwa sa problema sa pandemic.
Ang walo ka tunghaan nakaduso na sa ilang intent o tinguha ngadto sa Department of Education o DepEd VII.
Sumala pa ni Director Salustiano Jimenez, unom sa maong mga eskuylahan para sa kindergarten ug duha sa elementarya.
Hinuon, giawhag na ang naasoyng mga tunghaan pagtambag sa ilang mga tinun-an sa milabayng shool year nga mobalhin na lang pagpaenrol.
Kadaghanan sa walo ka eskuylahan nahimutang sa Sugbo ug ilang gisayran ang DepEd VII sa ilang plano sa miaging buwan.
Walay mahimo ang DepEd VII gawas sa pag-aprobar sa desisyon sa maong mga pribadong tunghaan kon di kini makatuman sa mga requirements para sa special permit alang sa pagpadagan og online distance learning.
Nagtuo si Jimenez nga nakahukom ang tagdumala sa maong mga tunghaan nga dili na lang mangabli kay dili sila maka-comply sa mga rekisitos para sa distance learning nga gisitar sa DepEd, Department of Health ug Inter-Agency Task Force for the Management of Emerging Infectious Diseases.
Sa nasayran, gitakda ang abli sa klase sa Oktubre 5. (Jhon Tadlip/JTY)
(Source: DepEd VII)