COVID-19 cases sa bansa umakyat na sa 34,073 — DOH

Umakyat na sa 34,073 ang bilang ng mga tinamaan ng coronavirus disease 2019 (COVID-19) sa Pilipinas.

Ito’y makaraang makapagtala ang Department of Health ng 1,006 na bagong impeksiyon.

Ayon sa DOH, sa nabanggit na bilang, 788 ang fresh cases habang 218 naman ang late cases.

Sumampa naman sa 9,182 ang mga nakarekober matapos maitala ang 274 recoveries.

Samantala, pumalo na rin sa 1,224 ang bilang ng mga nasawi sa pagpanaw ng 12 pang pasyente.