28.9 C
Manila
Friday, March 29, 2024

Comprehensive Earthquake Preparedness And Emergency Response Plan Sa Sarangani Province Gihan-Ay Na, Sarangani Search And Rescue Olympics Nagpadayon

- Advertisement -

Gibutyag karon ni Mr. Rene Punzalan, ang action officer sa PDRRMO Sarangani, nga ila ng gihan-ay ang kamugnaan sa Comprehensive Earthquake Preparedness and Emergency Response Plan sa probinsya sa Sarangani human nga nagmando kanila si Governor Steve Chiongbian Solon.

Segun ni Punzalan, gi-finalize na niini ang maong plano aron ma-aprobahan na kini sa gobernador. Naka-sentro matud pa ang ilang gibuhat nga comprehensive earthquake preparedness and emergency response plan sa upat (4) ka bahin, gikan sa pagpangandam sa prevention and mitigation, preparedness paingon na sa response ug rehabilitasyon. Wala pay kagamitan nga na-imbento nga maka-detect sa muabutay nga linog apan gikinahanglan matud pa nga adunay hugot nga pagpangandam inubanan sa mga pag-ampo sa Ginoo.

Gidayig ni Punzalan ang nahimong lakang sa munisipyo sa Malungon sa pagdumala ni Mayor Tessa Constantino kabahin sa pagpasabot ug pagpa-prepara sa mga residente oras nga mutay-og ang fault line gikan sa Makilala, North Cotabato paingon sa Malungon, Sarangani Province. Wala man gi-ampo nga mulihok ang Makilala-Malungon Fault apan gikinahanglan kining preparahan sa mga barangay nga posibleng maapektuhan.

Karong adlawa, adlaw nga Hwebes, mahimong sentro sa Region 12 ang mahitabo nga 4th quarter earthquake drill nga ipahigayon sa Kapitolyo sa Sarangani alayon sa nationwide simultaneous earthquake drill karong adlawa sa tibuok Pilipinas. Kabahin gihapon kini sa pagpangandam sa linog hilabi na sa mga tag-as nga gambalay susama sa Sarangani Capitol nga upat (4) ka andana, sa pagsuporta nila Senador Manny ug Congressman Ruel Pacquiao, Vice Governor Elmer De Peralta, tanang board member, ug mga mayores.

Karong semanaha pud mahitabo ang earthquake and tsunami drill sa duha (2) ka barangay sa lungsod sa Maasim.

Dili tiaw ang natagamtaman karon nga mga pagsulay tungod kay gawas sa linog, aduna usab nasinatian nga dagkong pagbaha tungod sa maot nga panahon ang ubang parte sa Pilipinas. Gani, anaa sa state of calamity niagi pang semana ang probinsya sa Cagayan sa Region One tungod gilunupan ang ilang lugar.

Niaging mga adlaw, giigo sa buhawi ang mga evacuation center sa North Cotabato. Naigo na sa linog, gisundan pa kini og buhawi. Aduna napuy musuluray nga bagyo, Bagyong Ramon, nga anaa karon sa bandang Samar. Wala kini direktang epekto sa Mindanao apan mao kini ang mutampo sa mga pag-ulan kon localized thunderstorm dinhi sa atong dapit, rason nga angay gihapong magbinantayon sa pagbaha, landslide, apil na ang dagkong hapak sa balod.

Samtang, sa pikas nga bahin, subay gihapon sa pagpangandam ang natigayon karon nga lima (5) ka adlaw nga “SARlympics” search and rescue competition sulod sa compound sa Kapitolyo sa Sarangani. Ikatulo (3rd) katuig na kining gipahigayon sa PDRRMO Sarangani apan karong tuiga, giablihan kini sa tanang search and rescue team sa entiro Rehiyon Dose. Kabahin gihapon kini sa pagpalig-on sa kahibalo ug kahanas sa mga rescuer panahon sa katalagman, apil na ang pagpakusog sa bonding ug sa network sa mga rescuer sa tibuok Region 12.

May giandam nga pa-premyo si Governor Solon ilalum sa Sulong Kaligtasan program nga One Hundred Thousand Pesos (P100K) sa kampyon, Eighty Thousand Pesos (P80K) sa ikaduhang pwesto, Sixty Thousand Pesos (P60K) sa ikatulong pwesto, ug tag-Dyes Mil ka pesos (P10K) isip consolation prizes. Gawas sa mga taga-Sarangani, anaa niapil ang mga rescuer nga gikan pa sa Lebak, Sultan Kudarat ug mga munisipyo sa South Cotabato. Ugma, Byernes, ang ilang closing and awarding ceremony.

 

(Photos: Ms. Catedral, PDRRMO Sarangani FBs)

- Advertisement -
- Advertisement -

Related Articles

- Advertisement -
- Advertisement -

Latest Articles

- Advertisement -