El ciudad de Zamboanga ya participa con el celebracion del 44th National Disability Rehabilitation and Prevention (NDRP) Week con tema “Pamahalaan Kabalikat sa Pagtupad ng Pantay na Edukasyon, Trabaho at Kabuhayan, Tugon sa Pagpapalakas ng Taong may Kapansanan. ”
El mencionao celebracion ya prinsipya del petsa deci syete este mez y acaba na petsa veinte tres del egual mez.
El PWD Sector del ciudad por medio del Unit de Persons with Disabilities Affairs baho con el oficina del CSWD y el ZCPWD Federation, ya prepara cuantos diperentes maga aktibidades para con el celebracion.
Ya prinsipya el celebracion por medio de un misa na St. Ignatius de Loyola Parish na Tetuan, Flag raising ceremony na City Hall y el plantada del maga tarpolina de NDRP Week hunto con el mas de setenta organisasyon de PWD na diperentes maga barangay aki na ciudad.
Durante el semana, ay presenta tambien el Departamento del Salud y el PhilHealth con el maga nuevo programa que ya prepara el ahensya para con el sektor de PWD.
Incluhido tambien na maga aktibidades que ay sucede durante el celebracion, el first-ever job fair para con el maga PWD hunto con el DOLE-9 por medio del Public Employment Service Office.
Todo este asegun ay incluhi seguiendo el kreyasyon del PWD que nuay asegun aserca diila el hinde sila incluhido o “Nothing About Us, Without Us”.
Ademas, el mencionao celebracion asegun base con el Proclamation 361 que ya man issue del August 19, 2000, que ta deklara el ika-3 semana del Hulyo como NDRP Week y ta culmina el nacimiento drl Sublime Paralytic Apolinario Mabini na petsa veinte tres. (Cristine Falcasantos)