Giawhag ni Dr. Teodulfo Joselito Retuya Jr., city epidemiologist, ang katawhan nga magbinantayon batok sa sakit nga dengue ilabina karong panahon sa ting-ulan ug posibleng pagdaghan sa mga itloganan sa lamok nga nagdala sa dengue virus.
Sigun ni Dr. Retuya mitala na ang syudad og walo (8) ka kaso sa dengue subay sa data gikan sa mga ospital sukad Enero 1 hangtod 16, 2021.
Busa, matod ni Dr. Retuya nga gawas sa gibantayan nga coronavirus disease, importante usab ang dengue surveillance sa komunidad ingon man ang pagbantay sa uban pang mga sakit sama sa measles ug leptospirosis.
Miapila usab si Dr. Retuya sa tanang mga Punong Barangay nga pakusgan pa ang kampanya batok dengue nga 4S kon Search and Destroy o pagpangita ug pagguba sa mga itloganan sa lamok, Seek Early Consultations diin mahimo usab pinaagi sa ‘Telekonsulta’, Self Protective Mechanism, ug Say Yes to Spraying/Fogging kung adunay clustering sa kaso sa dengue sa usa ka lugar.
Sumala sa dengue surveillance sa City Health Office sukad pa niadtong tuig 1998, makita ang ‘trend’ sa pagsaka o spike of cases sa dengue matag duha o tulo ka tuig.
Makita usab sa data nga sa tuig 2015 adunay 1,934 ka kaso sa dengue, 3,161 sa 2016, 1,717 sa 2017, 2,840 sa 2018, 4,344 sa 2019, ug 884 sa 2020. (CHO)