Human sa makusog nga linog karong buntag adlawng Miyerkules, December 16,2020 gilayong gimandu ni Gensan City Mayor Ronnel Rivera nga temporaryong gipasirado ang gambalay sa LGU kon City hall aron masiguro nga luwas kini sa mga empleyado ug katawhan apil ang tanang mga building ug opisina ubos sa local government unit sa syudad sa Gensan.
Pasado alas syete sa buntag karong adlawa mitay-og ang linog nga gituohang ang epis center kon sentro sa linog mao ang lungsod sa Alabel , Sarangani Province nga mitala ug 6.1 magnitude apan wala pa pa masuta ang damyos kutob niining maong pagsulat sa balita.
Apan subay sa kamanduan ni Mayor Rivera nga ipasirado una ang mga opisina sa LGU samtang magpahigayon ug inspection ang mga personahe sa City Engineers , OBO ug mga taga DPWH aron ipahigayon ang possible damage assessment .
Sumala sa initial nga mga report , pipila ka mga gambalay susama sa SM City Gensan , KCC ang adunay minor damage ug nagpadayon pa ang inspection karong panahona dinhi sa syudad sa Gensan. Wala pa usab nagpagawas ug assessment ang LGU alabel sa maong linog.
Gimanduan ang mga trabahante sa buhatan sa LGU sa Gensan nga mosulod sa ilang mga opisina apil ang mga kliyente karong ala una sa hapon .
Mitay-og ang linug human sa gipahigayong unang adlaw sa Simbang gabi karong adlawa alang sa pagsaulog sa pasko.
Una nang giingon sa Phivolcs DOST nga posibling mahitabo ang mga linog sa nagkadaiyang mga lugar sa Mindanao niining panahona susama sa nahitabo sa milabayng tuig 2019 bulan sa Nobyembre ug Disyembre . Angayan usab nga pangandaman ang posibling mahitabong tsunami sa nagkadaiyang mga lugar sa Mindanao. (Roniel Degorio, RPN DXDX GenSan)
