Cebu City – Miluwat sa katungdanan ang usa ka kontrobersiyal nga executive sa high-end resort sa dakbayan sa Lapu-Lapu nunot sa reklamo sa usa sa mga guest nga nagda og anak nga adunay autism nga wa ayoha pagtagad.
Gani, tungod niini, nag-post si Mai Pages sa insidente hinungdang giuwan og pagsaway si Manny Gonzales, shareholder sa resort, sa giingong discrimination.
Base sa official statement, gipahibawo sa Plantation Bay Resort and Spa nga si Gonzales mi-resign na isip ‘resident shareholder.’
Giingon usab sa statement nga si Gonzales nangayog pasaylo sa iyang sipyat sa panghukom nga misangko sa kaguliyang sa daghang inosenteng tawo.
Nagpasabot kini nga gitugyan na ni Gonzales ang tanang kaakohan ug responsibilidad sa general manager.
Hinuon, mihangyo sila nga dili na mohatag og dugang komentaryo.
Sa pikas bahin, ang tagduma sa Plantation Bay Resort and Spa mipasalig sa publiko nga ilang i-assess ang protocols ug magpasiugda og dugang proactive efforts ug mopatuman sa gikinahanglang kausaban karong semanaha. (Jhon Tadlip/JTY)
(Source & photo courtesy of Plantation Bay)