Subay sa nagkaduol nga “deadline”, nga September 30, 2021 alang sa pagpangrehistro nga gipahigayon sa buhatan sa COMELEC dinhi sa siyudad, ug sa tinguha usab nga ma-akomodar ang mga aplikanteng katawhan, ang lokal nga buhatan sa COMELEC ning siyudad ang mi-extend sa ilang “registration hours”, sugod niadtong Agosto 23, karong tuiga.
Sumala pa ning tinubdang buhatan, nga ang ilang oras ting-opisina ang magasugod alas 8:00 sa buntag ug molungtad hangtud sa alas 7:00 sa gabii, gikan sa adlaw’ng Lunes ngadto sa adlaw’ng Biyernes.
Samtang sa adlaw’ng Sabado ug mga holidays, kini ang magaserbisyo gikan alang 8:00 sa buntag, ngadto na sa alas 5:00 ang takna sa hapon.
Sulod ning mga bulan sa Agosto ug September ning tuiga, sa matag adlaw’ng Sabado lamang, ang City COMELEC ang mipahigayon og “satellite registration” sulod sa pito (7) ka mga barangay dinhi sa siyudad nga gilangkoban sa mga barangay sa Punta (Agosto 14), Cogon (Agosto 21), San Jose (Agosto 28), Diwan (September 4), Sangkol (September 11), Sinaman (September 18) ug Gulayon (September 25), tanan karong tuiga.
Dugang pang nasayran nga ang gihimong pagpang-rehistro sa COMELEC ang gihimo alang niadtong mga bag-ong botante, mo-transfer, lakip na usab niadtong magpa-activate.
Subay ning maong kalamboan, dugang nanawagan karon ang COMELEC ngadto sa mga katawhan sa pagpahimulos karon sa serbisyo nga gilugway niini isip pagpangandam alang sa umaabot nga pinili-ay sa bulan sa Mayo, sa sunod tuig.
Lakip usab sa gipahinumdom ngadto sa mga katawhan mao nga sa ila unya nga pag-adto sa COMELEC, dili nila hikalimtan sa pagsuot sa Face Mask, Face Shield, ug sa pagdala sa ilang kaugalingong mga ballpen nga magamit.
(Source: DIPOLOG CITY GOVERNMENT Facebook page)
