Aron paspas nga makab-ot ang herd immunity ug magpadayon ang CoVid-19 Vaccination Roll-out process kon Expanded Program on Immunization sa lalawigan sa Misamis Oriental padayon ang suporta sa nasyonal nga kagamhanan pinaagi sa pag-alokar og dugang pa nga mga CoVid-19 vaccines.
Malipayon nga gipahibalo ni Provincial Inter-Agency Task Force Chief Dr. Jerie Calingasan nga wala nahunong ang pagpatuman sa pagpbakuna alayon sa prioritization framework sa tibuok lalawigan.
Ning bag-o lang adunay gi-alokar nga mga CoVid-19 vaccines ang gidawat sa lalawigan sa Misamis Oriental gikan sa Department of Health.
Gipasalamatan ni Dr. Calingasan si Secretary Carlito Galvez kinsa Chief Implementer kon Vaccine Czar sa nasud sa Pilipinas sa paghatag og alokasyon alang sa lalawigan.
Matud ni Dr. Calingasan nga dunay 780 ka Pfizer vials ug dul-an 7,500 nga SinoVac vials alang sa unang doses ang mahatag sa katawhan.
Gipahibalo sab niini nga wala pa midangat ang 2nd dose sa Sputnik V nga vaccine ug dili angayan mabalaka ang nakadawat sa first dose niini kay mahimo kining molungtad sa 21 days ngadto 90 days.
Subay sa uwahing datos gikan sa PHO- MisOr anaa na sa 72% accomplishment rate o 115,179 ka vaccinees ang humana nabakunahan sa 1st dose gikan sa target nga 158,948 ka indibidwal.
Samtang mokabat sa 52,183 vaccinees o 63% accomplishment rate ang humana natupokan kaduha gikan sa target population nga 82,191.
Gikan sa maong record ang fully vaccinated niini misaka na ang ihap ngadto sa 80,791 ka mga indibidwal kung asa kini sila nakadawat sa lima ka klase sa bakuna nga mao ang AstraZeneca, SinoVac, Pfizer, Janssen ug Sputnik V.
Sa tuig kapin nga pakigbatok niining pandemya nagpabiling dakong hagit ang pagmintinar sa maayong panglawas sa kinabag-an ug ang mga lakang sa pakigbatok ning makamatay nga sakit apan padayon nga naglaom si Gobernador Bambi nga mabatokan kining Covid-19 pinaagi sa hugot nga kooperasyon gikan sa nasyunal nga kagamhanan, frontliners ug tanang katawhan sa lalawigan. (PHO-MisOr, photo courtesy by Dado Ruvic | Reuters)