Malamposong gipahigayon ang “3rd Quarter Meeting 2021” sa City Anti-Drug Abuse Council (CADAC) ning siyudad kaganihang mga alas 2:00 ang takna sa hapon, Septembre 30, 2021, didto sa 2nd floor, City Hall, Annex Building, ning dakbayan.
Ang nasangpit nga tigum ang gipangunahan ni City Mayor Darel Dexter T. Uy, isip chairman, tinambongan sa mga personalidad gikan sa mga miyembrong buhatan ug ahensiya dinhi sa siyudad.
Tumong sa maong panagtigum mao an pagsayod sa mga updates kalabot na sa Barangay Drug Clearing ug sa kasamtang update kalabot na sa Police Operation nga naglambigit sa kriminalidad ug droga.
Atol sa gipresentar nga situationer update pinaagi ni Dipolog City Chief of Police, Lt. Col. Kishna B. Asaali, nasayran nga ang iyang buhatan ang padayong mihimo sa gikinahanglan mga aksiyon alang sa pagsumpo sa bisan unsang matang sa krimen, lakip na ang padayong pagtumaw sa kaso sa ilegal nga droga dinhi sa atong dapit.
Dugang pa niini, nga sa padayong pagpaningkamot sa Dipolog City Police Station, uban sa hugot nga suporta sa kagamhanang lokal ning siyudad pinaagi ni Mayor Darel Uy, napadayon nilang natutokan ang pag-preserbar sa kahusay ug kalinaw dinhi sa atong dapit, diin sa kaso sa droga, ubay-ubay na ang ilang nasakote nga mga tigpayuhot niini.
Lakip sa gituki atol sa maong tigum mao usab ang update kalabot na sa gimugna nga Bahay Silangan Project dinhi sa siyudad nga magasilbing reformatory shelter alang sa mga drug surrenderers, diin sila didto ang mopa-ilawom sa reformation, counseling, livelihood training aron sila ang mamahimong mapuslan pagbalik dinhi sa atong katilingban, human sa ilang pagka-lambigit sa illegal nga droga, ug magbag-o na sa ilang mga kinabuhi.
Ang maong tigum ang gidumala sa lokal nga buhatan sa Department of the Interior and Local Government (DILG) pinaagi ni CLGOO Sherrie Charlota N. Machutes.
`Mitambong sa maong meeting sila si DepEd City Schools Division Superintendent, Dr. Virgilio Batan Jr., City Prosecutor, Atty, Herminia C. Enero, Mr. Hipolito Dalmacio sa City Health Office, City Parole and Probation Officer, Jeanette Requina, Agent May Lagarnia, sa probinsiyal nga buhatan sa PDEA ning lalawigan ug Mr. Alan Bengua, sa City Information Office, dinhi sa dakbayan.
(News & photo courtesy of DIPOLOG CITY GOVERNMENT Facebook page)