Cagayan de Oro – NAKITAAN karon og pagtaas sa kaso sa pertussis ang dakbayan sa Cagayan de Oro kung itandi sa nakalabay’ng mga tuig.
Nasayran gikan ni City Health Officer Dr. Rachel Dilla nga aduna na sila’y natala nga tulo ka mga kaso sa unang tulo pa lamang ka mga bulan ning tuig.
Kini nga ihap mas taas kung itandi sa nakalabay’ng mga tuig nga nakatala lamang og usa ngadto tulo ka kaso sa usa ka tuig.
Gipasabot ni Dr. Dilla nga tungod kini sa pag-ubos sa vaccination rate sa dakbayan panahon sa Covid-19 pandemic.
Sa kasamtangan, giklaro usab ni Dr. Dilla nga walay outbreak sa pertussis dinhi sa dakbayan, ug nanghinaot kini nga dili na mosangpot sa outbreak status.
Hugot ang panawagan sa opisyal nga magmabinantayon ang katawhan batok sa maong sakit ilabina sa mga kabataan.
Nasayran nga dili na bag-o ang maong sakit tungod kay nagsugod ang pagpamakuna niini kaniadto pang tuig 1975 ug nakontrolar na ang maong sakit human nakab-ot ang herd immunity.
News and photo courtesy of CIO CDO