Dos rebelde del New People’s Army (NPA) el ya rendi na autoridad amediante el intensificao campaña contra con el NPA na provincia de Sarangani, asegun con el anuncio del Area Police Command-Western Mindanao (APC-WM).
Si Police Lieutenant General Jonel Estomo, el jefe del APC-WM, ya nombra lang con el dos rendidores del NPA por medio de ila mga aliases como si Randy, 26 años el edad, y si M1, 41 años, ambos mga residentes del Barangay Upper Suyan, Malapatan, Sarangani.
Si Randy es un lider peloton mientras si M1 un siguidores del Frontera de Guerrilla-TALA del NPA na lejos region del Sur Mindanao.
Si Estomo ya habla, el dos ya rendi con el combinao personajes del policia y militar na Sitio Loot, Barangay Poblacion, Malapatan, Sarangani del Lunes.
Asegun con Estomo, el dos ya decidi rendi por causa del dificultad na vida que ta experiencia Sila y despues que ya sabe Sila cay de ila antes mga camarada, quien ya rendi de mas temrprano, ta logra ahora un buen vida junto con el de ila familiares.
Asegun con Estomo, el rendida del dos rebelde NPA ya facilita por medio del unido esfuerzo del policia, personajes de inteligencia na Sarangani con el completo suporta del Alpha Company del 73rd Infantry Battalion del Army.
Si Estomo ya habla, con el dos rendidores NPA el enrola na programa del gobierno conocido como el Enhanced Comprehensive Local Integration Program (E-CLIP) para puede sila principia vivi un nuevo vida.
Mientras tanto, si Estomo ta ase llamada con el restante miembros del NPA na Region 12 para rendi y toma parte con el programa del gobierno para el cambio real y mas prospero nuevo Pilipinas. (B. Garcia)